曹仁超 投資 守則

要投資成功幾大守則要記住-

　　一、寧買當頭起，莫買當頭跌。最佳入貨訊號係投資對象上升10－15％後。例如金價2001年4月 2日見二百五十五元九角美元，上升10－15％即見二百八十一元五角至二百九十四元三角，係最佳買入訊號，上述訊號去年1月已出現，即2002年起對黃金態度係逢低吸，直到有一天金價回落10－15％才平倉（依家最高見三百五十四美元，即止蝕位三百零一美元！）。

　　二、睇實、睇實再睇實。任何投資項目買入後必須睇實，股票如此，物業如此、債券亦如此。股票必須每周檢討其方向是否改變；債券必須每月檢討方向有冇改變；物業亦必須每季檢討方向，千萬不可買入後放十年八載便以為天降財富。天下間冇咁便宜的事，一旦方向改變立即離開。

　　三、去年同新城電台搞「曹仁超投資智慧」，介紹KISS理論（Keep It Simple, Stupid !），任何投資自己無法理解者最好唔參與。其實發達可以好簡單！KISS另一解釋係Keep It Safe, Smartguy !（安全第一，醒目仔）！許多人一味努力賺錢，而唔知道唔蝕錢更重要！成功與失敗不在閣下賺得快而在乎閣下留低幾多！97年時千萬富翁隨街走，一項冇科學根據嘅統計指出，當時等巴士長龍中有百分之七十二點五係千萬富翁（住緊層樓已值近千萬矣），但今時今日千萬富翁漸成稀有品種……。點解會咁？因為太多人留「佢」唔住，一味死博爛博而唔懂得持盈保泰，97年唔少千萬富翁今天淪為負資產一族。

　　四、困難日子唔代表冇銀搵。例如8x9年x六x四x事件後已證明乃入市最佳時機；97年8月本港樓市出問題，都係投資英、美、澳洲等地物業最佳時機；甚至2002年投資外匯及黃金者一樣獲可觀利潤。賺錢如發掘寶藏，必須有藏寶圖、刻苦及鍥而不舍的精神，然後找到定位，一舉而成功（但分分鐘失效）。

　　五、唔好問和尚借梳。有Ｄ所謂投資專家，自己都係負資產人士，又點可以教識你發達之道？大部分證券行內從業員職責唔係為你賺錢，而係為自己賺取傭金。因此唔好向經紀諮詢投資意見，只可利用經紀代你完成買賣，因為佢地唔係受訓做投資顧問，佢地嘅責任只係代客買賣股票。學嘢應請教投資已成功的人士，而非自己投資失敗而改行做投資專家的人士（對唔住！又得罪人）；股票市場可以賺錢理由皆因別人犯錯！股票市場永遠係少數人賺大多數人蝕的地方。
----------

在投資之前有冇問問自己：

　　一、該公司係咪一間穩健及有聲譽的公司？它是否擁有良好及有效率的管理層？

　　二、該公司生產什麽或提供什麽服務？在可見將來，社會對該產品或服務需求怎樣？

　　三、該公司從事的行業是否面對過分激烈競爭？它是否處於有利地位？

　　四、公司策略制訂者是否有遠見及進取？同時有冇過分擴充，令財政出現困難？

　　五、有冇細看公司資產負債表，核數師的評語如何（依家應該加上個核數師是否誠信可靠）？

　　六、公司過去有冇良好純利紀錄及合理派息政策，如有段日子唔派息，有冇好好解釋理由？理由是否充分？

　　七、公司中長期貸款及短期貸款有冇超過安全極限？該公司股價過去有冇大幅波動或無法解釋的波幅？

-----

其實投資好簡單，挑選優質股買入，直到股價上升一倍或以上才考慮獲利回吐，再用止蝕盤保護，以防自己分析錯誤，如此一來虧損被局限在15％之內；至於利潤，不妨讓它往前跑，通常獲利100％是最起碼要求，不少情況下利潤可達200％或以上。

--------

發達容易 搵食更艱難

　　我老曹相信差唔多任何人都可發達，發達並唔需要特別天才、家庭背景甚至學歷。我老曹曾經寫過「發達容易，搵食艱難」，即發達較搵食容易，但點解社會上咁少人發達？

理由係95%人響發達過程中犯錯，事關佢地唔記得開門七件事：

　　甲、誤信貼士。太多人唔做功課，睇報紙大標題買股票，如果D專家咁叻，點解佢地自己未發達？如果你停留響聽貼士水平，我老曹保證你冇發達！

　　乙、識乜唔重要，認識邊個才重要。請多點交朋友，我老曹係指可互相扶持的朋友，而非豬朋狗友。如果你同猴子在一起，你的思想行為遲早同猴子接近。

　　丙、做事要專心。唔少人以為別人發達係勤力，其實剛相反，世上最勤力的人通常從事低收入工作，富人工作時間並唔長但專心，一旦投入工作往往可廢寢忘餐，直到工作完成或上軌道後交畀屬下員工為止。

　　丁、誤信錢搵錢，以為自己窮係上一代冇蚊年剩落。事實上，唔少人富有的理由便是上一代貧窮，佢地立心脫離窮籍，結果錢愈賺愈多，最後富甲一方。佢地 致富之道係一旦機會來臨便利用槓桿原理（不懂借錢的人唔會發達，亂借錢的人很快破產），因此佢財富唔只由一百萬元變成二百萬元，而係由一千萬元變成一億元。換言之，看準機會響一段時間（例如十年）內令財富高速增長，然後及時減債便可以印印腳矣。

　　戊、大富由天、小富由儉，呢個世界冇天時地利人和，你唔可能成為蓋茨、畢非德或李實發，呢類人一千萬人中少於兩個，真係一命二運三風水……。對一般人而言，一千萬元應該十分吸引，如你肯花三十年時間去達到上述數字，人人可以做到，並非白日夢。

　　己、好多人話「財富係一項負擔」，呢句話係講畀窮人聽，唔好信。財富絕對唔係一項負擔，你可以交畀私人銀行負責或請專人負責。財富的好處係令你財政獨立，唔使為幾萬銀折腰，可從心所欲地去做自己喜歡的事。

　　庚、富有的人視賺錢為一種興趣而非一項苦差，一如我老曹每天寫呢個專欄三十年不變，有人問辛唔辛苦？答案係有時冇材料都幾辛苦，除此之外都係樂趣，希望讀者透過我老曹提供的財務意見改善自己理財方法；同時，在為讀者搜尋資料過程中，我老曹亦搵到投資機會。任何視賺錢為苦差者一定唔會發達。

在此順便重溫我老曹的「投資哲學」-

A、不要趁低買入，因為你唔知幾時才係最低，寧買當頭起，莫買當頭跌；
B、永遠記住行使止蝕，防止小損失變成大損失；
C、買賣前先做功課；
D、財富係透過逐小逐小累積起來的，唔好期望一朝發達；
E、冇必勝投資但有必勝投資策略。

有D投資戒條連我老曹自己亦可能忘記，在此同各位重溫。

　　一、無論情況如何緊記溝上唔溝落。

　　二、股票市場係賺錢地方，因此絕對要跟紅頂白而非鋤強扶弱，幾時都應吸納強勢股，沽出弱勢股。

　　三、持有蝕本股不放有兩大損失：A、股價上嘅損失；B、失去將資金投資其他項目嘅損失。因此絕對要止蝕。

　　四、股市唔係低價買入高價賣出嘅地方（冇人做得到），應該高價買入更高價賣出，因此宜高追不宜趁低買入。

　　五、牛市中錯失獲利機會冇有怕，因為下一浪更高；熊市中寧可賺少D，亦不應太遲離市。

　　六、股市表現可能同自己想法背馳好耐，所以淡市莫估底，旺市莫估頂。

　　七、第一次出現裂口上升時不妨買入；如出現裂口回落係時候離開。

　　八、旺市時不妨膽大D，因為形勢在我；淡市時少玩，因為氹仔浸死人。

　　九、投資成功先了解基本因素，再利用技術分析決定買賣時機，只識技術分析唔了解基本因素者，只係花拳繡腿（睇得但唔打得）。

　　十、升市將盡小心「單日轉向」或「單周轉向」走勢，通常幾有用。最簡單的技術分析最有用，太複雜的技術分析只係用嚟嚇初學者。

　　十一、了解群眾心理亦十分有用，因群眾常常睇錯市。

　　十二、止蝕唔止賺，通常賣出之後股價才大升，我地少賺50%或以上。獲利回吐易，止蝕賣出難，只有克服上述心理，才能在股市立足。

-----------

寧願蝕息不可蝕價

　　股聖畢非德旗下巴郡哈撒韋透露去年度手上現金高達三百六十億美元（2002年年底只有一百三十億美元），響現今低利率情況下，點解保留咁多茄殊在手？投資涉及兩問題：一B賺息（例如存款有利息、買樓有租收、買股票有股息、買債券有債息）；二、賺價（外匯有波動、樓價有升降、股價有上落、債券價格可升可跌）。一般人過分強調賺息，因為仍需要利息收入去改善生活素質；有錢人卻強調賺價，因為佢地嘅收入已唔再需要收息。令你富有嘅係賺價，唔係賺息；令你貪窮嘅亦係蝕價，唔係蝕息。1997年8月買樓收租至今，結果七年租金收入抵不上樓價回落；反之，過去三年摣金冇息收，但卻可賺價。雖然黃金冇利息，但金價上升60％，跑贏過去三年樓價！

　　股份亦一樣，高息股通常唔係增長股，而且隨時面對派息減少甚至唔派息；增長股從來唔可能派高息，因為資金有更佳用途。合理股息應響三厘半之下，一旦高於三厘半，已再唔係增長股。有時客觀情況係面對蝕息或蝕價嘅問題，畢非德教曉我地寧可蝕息，不可蝕價。

--------

各位應緊記以下八大格言：
一、訂立守則管制自己行為（例如止蝕沽盤）；
二、不要只見高回報率，忽略高風險所在；
三、未買先賣（未買入任何投資前，先計計自己可以輸幾多）；
四、不可承擔超過自己能力的投資（例如有三十萬元炒一百萬元貨）；
五、不可感情支配理智（面對損失之時因輸唔起而感情用事）；
六、不可自己冇主見而誤聽別人意見（忘記真主意、假商量守則）；
七、不可冇為自己行為負責的性格；
八、切勿忘記以上七大格言。

　　如果你真係希望透過投資股票而發一筆小財，請坐下來拿出紙和筆，回憶一下過去股票投資蝕本嘅每一個理由，當年為何決定吸入某股及最後為何事與願違，如我地唔從自己失敗中學習便永遠唔會成功。如失敗後你便忘記，亦永遠不能從過去失敗中獲得教訓，你又點可以較你的鄰居或你的同學富有？每個人都會作出愚蠢嘅決定，甚至股聖畢非德響1991年致股東信中亦承認自己過去曾作出唔少錯誤決定而賺少許多，便是他知錯能改，逃過2000至2003年科網股災。

　　投資往往三七分（即三次成功七次失敗）。成功投資者係嗰D將三次成功回報盡量擴大，例如賺取30-50％回報，以及將失敗損失盡量減少（例如止於10％）。除咗騙子，冇人每次都成功，通常面對失敗機會高達70％，如唔好好處理自己的失敗項目，遲早一敗塗地。

　　我老曹投資哲學唔係打贏大市（beat the market），而係透過投資達到按年增值的利益。投資策略唔係追求高回報，而係永遠安全第一。

-------------

　　成功投資者同失敗投資者分別唔大，只有三點分別：

　　一、止蝕唔止賺。人性不願承認自己做錯，以為不賣不蝕，如你無法打破呢關，仲係唔不投資好。

　　二、資產分配。常用方法係一百減年齡，即二十歲80％資金買股票，八十歲20％資金買股票。其次係千萬不可將所有錢用於買一隻股票，分散投資幾時都重要。

　　三、除非你從事地產生意或者極之富有，不然千萬不可擁有一個以上住宅單位。普通家庭如能力可以負擔，擁有自住物業供樓開支係家庭收入25-50％無可厚非，其餘都係投資博取資本升值；如冇資本升值機會者都唔好買。過去幾多香港普通家庭回國買度假屋係十分不智的決定，通常每年度假只有兩、三個星期，應否為每年只用兩、三個星期而擁有一間度假屋？而且度假地方應每次都唔同，冇理由每次都去同一地方度假。度假屋屬於極之富有人家的享受，普通家庭不宜擁有度假屋，因為只會綁死資金。普通家庭應投資股票、基金、外幣或債券（睇適當時刻而定），而非購買第二個住宅作度假之用。

　　上述三點已係老生常談，但仍然有唔少人常犯。

炒樓炒股力不到不為財

　　馬克斯認為，響股票市場賺錢係犯罪及欺詐嘅行為，係資本家剝削貧窮嘅成果，佢認為財富嘅產生係透過勞動階級流汗甚至有時流血的成果，結果共產主義制度發展初期必定關掉股票市場，然後清算資本家！但蘇聯及中國嘅實驗證明，只有勞工階級冇資本家嘅經濟係無法繁榮起來。1997年7月1日前香港人以為炒炒樓、炒炒股票，財富便可不勞而獲，唔相信「力不到不為財」。所有財富背後都有汗漬，甚至炒樓炒股票都必須做足功課，才有機會成功，如不做功課，注定遲早失敗。甚至你從上一代繼承財富，都係前人辛勞的成果。投資回報率來自正確決定上，而非單單因為你有錢投資。

　　換言之，財富的產生既要勞亦要資，缺一不可。有勞無資的共產主義制度不行，有資便妄想不勞而獲亦不可行。香港經歷過七年上落市，港人終於明白到炒樓、炒股票並非不勞而獲，而係涉及高深學問，力不到不為財。

　　所有成功嘅CEO每周工作超過五十九小時或每天工作十小時（周日休息），甚至或每天工作十二小時（周六、周日休息）；每天只願工作八小時者喺現今激烈競爭嘅商業社會中只能做低級工作，如果你不願每周工作五十九小時，便無法有成就。